წესები და პირობები

წესები და პირობები

ვებ-გვერდი: Aicourt.ge

ძალაში შესვლის თარიღი: 12 სექტემბერი, 2026 წელი

წინამდებარე წესები და პირობები (შემდგომში — „ხელშეკრულება“ ან „პირობები“) წარმოადგენს იურიდიულად სავალდებულო შეთანხმებას მომხმარებელსა (შემდგომში — „მომხმარებელი“ ან „თქვენ“) და ვებ-გვერდ Aicourt.ge-ს (შემდგომში — „პლატფორმა“ ან „ჩვენ“) შორის.

გთხოვთ, ყურადღებით გაეცნოთ აღნიშნულ პირობებს პლატფორმით სარგებლობამდე. ვებ-გვერდზე შესვლით, სააბონენტო პაკეტის შეძენით, ძიებისა და ანალიზის ფუნქციით სარგებლობით ან რეგისტრაციით, თქვენ ადასტურებთ, რომ სრულად ეთანხმებით და იღებთ ვალდებულებას დაიცვათ წინამდებარე წესები. თუ არ ეთანხმებით რომელიმე პირობას, გთხოვთ, შეწყვიტოთ პლატფორმით სარგებლობა.

1. მომსახურების აღწერა და საძიებო მიმართულებები

1.1. Aicourt.ge არის ინოვაციური სამართლებრივი საძიებო და ანალიტიკური პლატფორმა, რომელიც ხელოვნური ინტელექტის (AI) ტექნოლოგიების გამოყენებით ახორციელებს სამართლებრივი მასალების მოძიებას, ანალიზს, განმარტებასა და მოკლე შინაარსის (რეზიუმეს) გენერირებას მომხმარებლის მიერ დასმული კითხვების შესაბამისად.

1.2. პლატფორმაზე ხელმისაწვდომია ოთხი დამოუკიდებელი სამართლებრივი მიმართულების/ბაზის ძებნა და ანალიზი:

• საქართველოს უზენაესი სასამართლოს გადაწყვეტილებების ბაზა;
• საქართველოს საკონსტიტუციო სასამართლოს გადაწყვეტილებების ბაზა;
• ადამიანის უფლებათა ევროპული სასამართლოს (ECtHR / HUDOC) გადაწყვეტილებების ბაზა;
• საქართველოს მოქმედი საკანონმდებლო ბაზა.

1.3. პლატფორმაზე განთავსებული სამართლებრივი აქტებისა და სასამართლო პრაქტიკის პირველწყარო წარმოადგენს ოფიციალურ, საჯაროდ ხელმისაწვდომ ინფორმაციას.

2. პასუხისმგებლობის შეზღუდვა (Disclaimer) — მნიშვნელოვანი გაფრთხილება

2.1. არ წარმოადგენს იურიდიულ კონსულტაციას: Aicourt.ge-ს მიერ ხელოვნური ინტელექტის მეშვეობით გენერირებული პასუხები, განმარტებები, ნორმატიული ანალიზი, ქეისების შეჯამებები და ანალიტიკური ტექსტები განკუთვნილია მხოლოდ საინფორმაციო და საგანმანათლებლო-დამხმარე მიზნებისთვის. პლატფორმის მიერ მოწოდებული არცერთი ინფორმაცია არ უნდა იქნას განხილული, როგორც ოფიციალური იურიდიული კონსულტაცია, იურიდიული დასკვნა ან ადვოკატის პროფესიული მომსახურება.

2.2. AI-ის შეცდომების (ჰალუცინაციების) რისკი: ხელოვნური ინტელექტის ბუნებიდან გამომდინარე, არსებობს რისკი, რომ პლატფორმის მიერ გენერირებული ტექსტი შეიცავდეს უზუსტობებს, არასწორ ინტერპრეტაციებს ან ფაქტობრივ შეცდომებს (ე.წ. AI Hallucinations). პლატფორმა არ იძლევა გარანტიას AI-ის მიერ მომზადებული ანალიზისა თუ განმარტებების 100%-იან უტყუარობასა და სიზუსტეზე.

2.3. გადამოწმების ვალდებულება: მომხმარებელი თავად არის სრულად პასუხისმგებელი, ნებისმიერი სამართლებრივი მოქმედების განხორციელებამდე ან პრაქტიკული გადაწყვეტილების მიღებამდე გადაამოწმოს AI-ის მიერ მოძიებული საკანონმდებლო ნორმის მოქმედი რედაქცია, სასამართლო გადაწყვეტილების ნომერი, თარიღი და სრული ტექსტი ოფიციალურ პირველწყაროებში (მაგალითად: matsne.gov.ge, supremecourt.ge, constcourt.ge, hudoc.echr.coe.int).

2.4. პასუხისმგებლობის გამორიცხვა: პლატფორმა, მისი მფლობელები, დირექტორები, თანამშრომლები ან პარტნიორები არავითარ შემთხვევაში არ არიან პასუხისმგებელნი პირდაპირ, არაპირდაპირ, შემთხვევით ან შემდგომ ზიანზე (მათ შორის, ფინანსურ ზარალზე, სასამართლო დავის წაგებაზე, საპროცესო ვადების გაშვებაზე ან რეპუტაციულ ზიანზე), რომელიც გამოწვეულია პლატფორმის მიერ მიწოდებული ინფორმაციის გამოყენებით ან გამოყენების შეუძლებლობით.

3. საფასო პოლიტიკა, კრედიტების აღრიცხვა და სააბონენტო პაკეტები

3.1. კრედიტების ჩამოჭრის წესი:

• პლატფორმაზე ძებნისა და ანალიზის ფუნქციონალი ეფუძნება კრედიტების სისტემას.
• წინამდებარე პირობების 1.2 პუნქტში მითითებული თითოეული დამოუკიდებელი სამართლებრივი ბაზის (უზენაესი სასამართლო, საკონსტიტუციო სასამართლო, ევროპული სასამართლო, საქართველოს კანონმდებლობა) მოძიება და ანალიზი ერთი საძიებო მოთხოვნის ფარგლებში შეფასებულია 1 კრედიტად.
• იმ შემთხვევაში, თუ მომხმარებელი ერთი საძიებო მოთხოვნისას მონიშნავს ოთხივე ბაზას ერთდროულად, მისი ანგარიშიდან ჩამოიჭრება 4 კრედიტი (თითოეულ არჩეულ ბაზაზე 1 კრედიტი). მომხმარებელი უფლებამოსილია თავად განსაზღვროს, თუ რომელი ბაზ(ებ)ის რესურსი სურს გამოიყენოს კონკრეტული შეკითხვისას.

3.2. სააბონენტო პაკეტების ჩამონათვალი და პირობები:

პლატფორმა მომხმარებელს სთავაზობს შემდეგ სააბონენტო პაკეტებს:

პაკეტის დასახელება	ერთი თვის ღირებულება	კრედიტები	ჩანიშვნები	ხელმისაწვდომი ბაზები და ფუნქციონალი
სტარტერი	10 ლარი	10 კრედიტი	5 ჩანიშნული გადაწყვეტილება	უზენაესი სასამართლოს ბაზა; საქართველოს საკანონმდებლო ბაზა
საბაზისო	25 ლარი	35 კრედიტი	10 ჩანიშნული გადაწყვეტილება	უზენაესი სასამართლოს ბაზა; საკონსტიტუციო სასამართლოს ბაზა; საქართველოს საკანონმდებლო ბაზა;
პროფესიონალი	40 ლარი	60 კრედიტი	20 ჩანიშნული გადაწყვეტილება	უზენაესი სასამართლოს ბაზა; საკონსტიტუციო სასამართლოს ბაზა; ადამიანის უფლებათა ევროპული სასამართლოს (ECtHR) ბაზა; საქართველოს საკანონმდებლო ბაზა; გადაწყვეტილების ჩამოტვირთვის უფლება
ექსპერტი	99 ლარი	180 კრედიტი	60 ჩანიშნული გადაწყვეტილება	უზენაესი სასამართლოს ბაზა; საკონსტიტუციო სასამართლოს ბაზა; ადამიანის უფლებათა ევროპული სასამართლოს (ECtHR) ბაზა; საქართველოს საკანონმდებლო ბაზა; გადაწყვეტილების ჩამოტვირთვის უფლება

3.3. მოქმედების ვადა და კრედიტების განულება:

• ნებისმიერი შეძენილი სააბონენტო პაკეტის მოქმედების ვადა შეადგენს მკაცრად 1 თვეს (30 კალენდარულ დღეს) აქტივაციის მომენტიდან.
• კრედიტების გაუქმება: 1-თვიანი სააბონენტო ვადის ამოწურვისთანავე, პაკეტში შემავალი გამოუყენებელი კრედიტების ნაშთი (სულ რომ მომხმარებელს დარჩენილი ჰქონდეს ყველა კრედიტი სრულად) სრულად ნულდება და მომდევნო თვეზე არ გადადის.

3.4. ერთჯერადი ძებნა: იმ შემთხვევაში, თუ მომხმარებელს არ აქვს აქტიური სააბონენტო პაკეტი ან ამოეწურა კრედიტები და სურს სერვისით სარგებლობა, თითოეული ინდივიდუალური საძიებო მოთხოვნის სტანდარტული ღირებულება შეადგენს 2 ლარს და მსგავსი ძებნის გააქტიურების მოთხოვნით უნდა მიმართოს პლატფორმის ადმინისტრაციას ელ-ფოსტის მეშვეობით. პლატფორმის ადმინისტრაცია უფლებამოსილია დააკმაყოფილოს მომხმარებლის მოთხოვნა და გაუაქტიუროს ერთჯერადი ძებნის ფუნქცია ან უარი უთხრას მოთხოვნის დაკმაყოფილებაზე ყოველგვარი დასაბუთების გარეშე.

3.5. პლატფორმის მიერ სააბონენტო პაკეტის პირობების ცვლილება: პლატფორმის მიერ სააბონენტო პაკეტის პირობების ან/და ღირებულების ცვლილების შემთხვევაში, მომხმარებლის მიერ უკვე შეძენილი (მიმდინარე) პერიოდის პირობები რჩება უცვლელი ვადის ამოწურვამდე. ახალი პირობები და ტარიფები ძალაში შედის მომდევნო საანგარიშო (სააბონენტო) პერიოდის განახლებისთანავე. იმ შემთხვევაში, თუ მომხმარებელი არ ეთანხმება განახლებულ პირობებს, მას უფლება აქვს გააუქმოს გამოწერა მომდევნო საანგარიშო პერიოდის დაწყებამდე.

3.6. ავტომატური განახლება (რეკურენტული გამოწერა):

• სააბონენტო პაკეტები ავტომატურად განახლებადია. ყოველი 30-დღიანი პერიოდის ბოლოს მომხმარებლის მიერ მითითებული და შენახული საბანკო ბარათიდან ავტომატურად ჩამოიჭრება შესაბამისი პაკეტის მოქმედი ყოველთვიური საფასური.
• პირველი გადახდისას მომხმარებლის ბარათი უსაფრთხოდ ინახება საგადახდო პროვაიდერის სერტიფიცირებულ სისტემაში (პლატფორმა არ ინახავს ბარათის სრულ მონაცემებს).

3.7. გამოწერის გაუქმება და ბარათის წაშლა:

• ავტომატური განახლების გაუქმება მომხმარებელს შეუძლია ნებისმიერ დროს, საკუთარი ანგარიშის მართვის პანელიდან („გამოწერები“ /account/subscriptions).
• გაუქმების შემთხვევაში, უკვე გადახდილი 30-დღიანი პერიოდის ბოლომდე მომხმარებელი ინარჩუნებს კრედიტებით სარგებლობის უფლებას; ვადის გასვლის შემდეგ შემდგომი გადახდა აღარ განხორციელდება, ხოლო დარჩენილი კრედიტები განულდება.
• შენახული ბარათის წაშლა შესაძლებელია ჩანართიდან „დამახსოვრებული ბარათები“, რაც ავტომატურად თიშავს მომდევნო რეკურენტულ განახლებას.

4. თანხის დაბრუნების პოლიტიკა (Refund Policy)

4.1. მომხმარებელს უფლება აქვს მოითხოვოს შეძენილი სააბონენტო პაკეტის გაუქმება და გადახდილი თანხის დაბრუნება პაკეტის აქტივაციიდან 30 კალენდარული დღის განმავლობაში.

4.2. გამოკლებისა და გაანგარიშების წესი: თანხის დაბრუნების შემთხვევაში, მომხმარებლის მიერ გადახდილ პაკეტის მთლიან ღირებულებას გამოაკლდება მის მიერ უკვე გამოყენებული რესურსის ღირებულება.

4.3. პაკეტის ფარგლებში განხორციელებული თითოეული გამოყენებული კრედიტი (ძებნა) შეფასდება ერთჯერადი ძებნის სტანდარტული ტარიფით, რაც შეადგენს 2 ლარს. შესაბამისად, დაბრუნებას დაქვემდებარებული თანხა გამოითვლება შემდეგი ფორმულით:

დასაბრუნებელი თანხა = გადახდილი პაკეტის ღირებულება — (გამოყენებული კრედიტების რაოდენობა × 2 ლარი)

4.4. იმ შემთხვევაში, თუ გამოყენებული კრედიტების ღირებულება (გამოყენებული კრედიტების რაოდენობა × 2 ლარი) უტოლდება ან აღემატება სააბონენტო პაკეტის საწყის საფასურს, გადახდილი თანხა დაბრუნებას აღარ ექვემდებარება.

5. მომხმარებლის უფლება-მოვალეობები და აკრძალვები

5.1. მომხმარებელს უფლება აქვს გამოიყენოს პლატფორმა პირადი, საგანმანათლებლო და პროფესიული საქმიანობისთვის.

5.2. მომხმარებელს კატეგორიულად ეკრძალება:

• პლატფორმის მასობრივი ავტომატური სკანირება, მონაცემთა ბაზების ამოღება (Scraping/Crawling/Parsing) ან სისტემური მონაცემების კოპირება ჩვენი წინასწარი წერილობითი ნებართვის გარეშე;
• პლატფორმის პროგრამული კოდის, ალგორითმების, API-ს ან უსაფრთხოების მექანიზმების გვერდის ავლის, შეცვლის, ინჟინრული კვლევის (Reverse Engineering) ან დაზიანების ნებისმიერი მცდელობა;
• სისტემაში მავნე პროგრამული კოდის, ვირუსების ან ბოტების ინტეგრირება;
• საძიებო მოთხოვნებში (პრომპტებში) სენსიტიური პერსონალური მონაცემების (მაგ.: განსაკუთრებული კატეგორიის პერსონალური მონაცემები, სამედიცინო ჩანაწერები, ფინანსური საიდუმლოებები) შეყვანა.

5.3. პლატფორმა უფლებას იტოვებს რომ ნებისმიერ დროს, ყოველგვარი წინასწარი გაფრთხილების გარეშე დაბლოკოს ნებისმიერი მომხმარებელი, რომელიც გააჩენს გონივრულ ეჭვს რომ არღვევს წინამდებარე წესებსა და პირობებს.

6. ინტელექტუალური საკუთრება

6.1. ვებ-გვერდის დიზაინი, პროგრამული კოდი, ლოგო, ინტერფეისი, AI ინტეგრაციის ალგორითმები, მონაცემთა ბაზების დამუშავების არქიტექტურა და სავაჭრო ნიშნები წარმოადგენს შპს „ლიგალ სოლუშენ ტექნოლოჯი“-ს ექსკლუზიურ საკუთრებას და დაცულია კანონმდებლობით.

6.2. სასამართლო გადაწყვეტილებებისა და ნორმატიული აქტების ოფიციალური ტექსტები წარმოადგენს საჯარო ინფორმაციას, თუმცა პლატფორმის მიერ მათი დამუშავების, სტრუქტურირების, ანალიტიკური რეზიუმირებისა და გენერირებული ტექსტების ფორმატი დაცულია პლატფორმის საავტორო და მიმდებარე უფლებებით.

7. მომსახურების შეზღუდვა და შეწყვეტა

7.1. პლატფორმა იტოვებს უფლებას, ნებისმიერ დროს, წინასწარი გაფრთხილების გარეშე შეუჩეროს ან სამუდამოდ გაუუქმოს წვდომა მომხმარებელს, თუ არსებობს საფუძვლიანი ეჭვი წინამდებარე პირობების დარღვევის, არაკეთილსინდისიერი ან მავნე გამოყენების შესახებ.

7.2. პლატფორმა არ აგებს პასუხს გლობალური ინტერნეტ-ქსელის შეფერხებებზე, ჰოსტინგ-პროვაიდერის ან მესამე მხარის (მათ შორის, AI ძრავების გლობალური მომწოდებლების) ტექნიკურ ხარვეზებზე, რომლებმაც შესაძლოა დროებით შეაფერხოს სერვისის მიწოდება.

8. ცვლილებები წესებსა და პირობებში

8.1. პლატფორმის ადმინისტრაცია უფლებამოსილია, საკუთარი შეხედულებისამებრ, ნებისმიერ დროს ცალმხრივად განაახლოს ან შეცვალოს წინამდებარე წესები.

8.2. განახლებული პირობები ძალაში შედის ვებ-გვერდზე გამოქვეყნებისთანავე. პლატფორმით სარგებლობის გაგრძელება ცვლილებების გამოქვეყნების შემდეგ ავტომატურად განიხილება, როგორც თქვენი სრული თანხმობა განახლებულ პირობებზე.

9. მარეგულირებელი სამართალი და იურისდიქცია

9.1. წინამდებარე ხელშეკრულება რეგულირდება და განიმარტება საქართველოს მოქმედი კანონმდებლობის შესაბამისად.

9.2. ნებისმიერი დავა ან უთანხმოება, რომელიც გამომდინარეობს ამ პირობებიდან ან დაკავშირებულია პლატფორმის გამოყენებასთან, გადაწყდება მხარეთა შორის მოლაპარაკების გზით. შეთანხმების მიუღწევლობის შემთხვევაში, დავას განიხილავს საქართველოს საერთო სასამართლოები, განსჯადობის წესების დაცვით თბილისის საქალაქო სასამართლოში.

10. საკონტაქტო და იურიდიული რეკვიზიტები

კითხვების, პრეტენზიების ან სააბონენტო პაკეტთან დაკავშირებული საკითხების შემთხვევაში, გთხოვთ დაგვიკავშირდეთ:

• ელექტრონული ფოსტა: info@aicourt.ge
• კომპანია: შპს „ლიგალ სოლუშენ ტექნოლოჯი“
• საიდენტიფიკაციო ნომერი: 425373071